Eкіжақты қарым-қатынастар

Жалпы мағлұмат

1992 жылғы 19 қаңтарда екі ел арасында дипломатиялық қатынастар орнатылды.

1992 жылғы қазаннан бастап Ұлыбританияның Қазақстандағы Елшілігі жұмыс істейді.

1996 жылғы ақпаннан бастап ҚР Ұлыбританиядағы Елшілігі қызмет атқарады.

2017 жылғы ақпаннан бастап Е.Ә. Ыдырысов Қазақстан Республикасының Ұлыбританиядағы Төтенше және Өкілетті Елшісі қызметін атқарады.

2018 жылғы қаңтардан бастап М. Гиффорд Ұлыбританияның Қазақстан Республикасындағы Елшісі қызметін атқарады.

Саяси қатынастар

2017 жылғы 19 қаңтарда Қазақстан мен Ұлыбритания арсындағы дипломатиялық қатынастардың орнатылғанына 25 жыл толды.

Ширек ғасыр уақыт ішінде елдеріміздің арасындағы қатынастар теңдессіз жоғары деңгейге жетті: екі ел басшылары арасындағы қатынастар үнемі нығаюда, өзара сауда қарқыны өсуде, келісімшарттар базасы кеңеюде, екіжақты қарым-қатынас институттары тиімді жұмыс атқаруда. Біріккен Корольдік біздің экономикамыздың бесінші ең ірі инвесторы болса, Қазақстан Британияның 14 сыртқы экономикалық серіктесі тізіміне қосылды.

Ұлыбритания Премьер-Министрі Д.Кэмеронның 2013 жылы Қазақстанға мемлекеттік сапары кезінде қол қойылған стратегиялық серіктестік туралы Бірлескен мәлімдеменің қабылдануы қазақстан-британ қатынастарының ерекше мәртебесін айғақтайтын аса елеулі оқиға болды.

Дипломатиялық қатынастар орнатылған мезгілден бастап ҚР Президенті Н.Ә.Назарбаевтың Ұлыбританияға тоғыз сапары жасалды (1991, 1992, 1994, 1997, 2000, 2006, 2012, 2013 және 2015 жылдары).

Қазақстанға Корольдік отбасы мүшелері - британ тағының мұрагері Уэльс Ханзадасы Чарльз (1996 ж.), Ханшайым Анна (1993 ж.), Глостер Герцогы Ханзада Ричард (2000 және 2017 жылдар), Ұлыбританияның сауда және инвестициялар жөніндегі арнайы өкілі Йорк Герцогы Ханзада Эндрю (2003, 2006, 2007, және 2010 жылдар) және Кент Ханзадасы Майкл (2009 ж.) сапармен барды.

2014 жылғы 17 қазанда ҚР Президенті Н.Ә. Назарбаев пен Ұлыбритания Премьер-Министрі Д. Кэмерон Милан қаласында (Италия) өткен АСЕМ саммиті аясында екіжақты кездесу өткізді.

ҚР Президенті Н.Ә.Назарбаевтың 2015 жылы Ұлыбританияға ресми сапары стратегиялық серіктестікті одан әрі нығайтуға аса қуатты серпін берді. Сапар барысында Мемлекет басшысы Патшайым Елизавета ІІ-мен, Біріккен Корольдік Премьер-Министрі Д. Кэмеронмен және аса ірі британ компаниялары басшыларымен кездесті.

ҚР Президенті Н.Ә. Назарбаев пен Ұлыбритания Премьер-Министрі Д.Кэмерон арасында өткен келіссөздер нәтижесінде келесі құжаттарға қол қойылды:

- Қазақстан Республикасы және Ұлыбритания және Солтүстік Ирландия Біріккен Корольдігі арасындағы қылмыстық істер жөніндегі өзара құқықтық көмек жөніндегі келісім;

- Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігі және Ұлыбритания және Солтүстік Ирландия Біріккен Корольдігінің Үкіметі арасындағы мемлекеттік қызмет саласындағы өзара түсіністік туралы меморандум;

- Ұлыбритания және Солтүстік Ирландия Біріккен Корольдігінің «ЭКСПО-2017» халықаралық көрмесіне қатысуы жөніндегі келісімшарт.

Сапар аясында сондай-ақ қазақстан-британ үкіметаралық комиссиясының екінші отырысы және «Самұрық-Қазына» ҰӘҚ» АҚ және Сауда және инвестициялар жөніндегі британ агенттігінің (UKTI) қазақстан-британ іскерлік кеңесінің құрылтай отырысы өтті. Отырыстар қорытындылары бойынша жалпы құны 13 млрд АҚШ долларын құрайтын 46 келісімге қол қойылды.

2016 жылғы 4 қыркүйекте Ханьчжоуда (Қытай) өткен G20 Саммиті аясында ҚР Президенті Н.Ә. Назарбаевтың Британияның жаңа Премьер-министрі Т.Мэймен кездесуі өтті. Кездесу соңында британ үкіметінің басшысы Қазақстанға сапармен келуге шақыру алды.

2015 жылғы 22-24 ақпанда Ұлыбританияға ҚР Премьер-Министрі К. Мәсімов сапармен келді. Сапар аясында ол жаһандық құқықтық саммит жұмысына қатысып, британдық министрлермен, саяси қайраткерлермен және іскер топтар өкілдерімен бірқатар кездесу өткізді.

2016 жылғы 6-7 қазанда ҚР Сыртқы істер министрі Е. Ыдырысов Лондонға жұмыс сапарымен келіп, Ұлыбритания Сыртқы істер және достастық істері жөніндегі министрі Б.Джонсонмен қазақстан-британ стратегиялық диалогының отырысын өткізді және Ұлыбританияның «ЭКСПО-2017» көрмесіне арналған ұлттық павильоны жобасының тұсаукесеріне қатысты.

2017 жылғы 26-27 маусымда Глостер Герцогы Ханзада Ричардтың Қазақстанға сапары екі ел қатынастарындағы аса маңызды оқиғалардың бірі болды. Сапар аясында Ханзада Ричард «ЭКСПО-2017» көрмесіндегі британ павильонында өткен Ұлыбритания Ұлттық күнінің ашылуына қатысты.

2017 жылғы 19-21 шілдеде Ұлыбританияның Сауда және инвестициялар жөніндегі мемлекеттік министрі Грег Хэндс Қазақстанға ресми сапармен келді. Сапар барысында Г. Хэндс ҚР Премьер-Министрі Б. Сағынтаевпен, «Астана ЭКСПО-2017» ҰК» АҚ басқармасының төрағасы А. Есімовпен, ҚР Инвестициялар және даму министрі Ж. Қасымбекпен кездесулер өткізіп, «Shell» компаниясының технологиялар көрмесі мен «Лондондық биржа тобы» және «Самұрық-Қазына» Ұлттық әл-ауқат қоры ұйымдастырған капитал нарығы жөніндегі конференцияны ашты.

Парламентаралық қатынастар

2015 жылғы қазаннан бастап Ұлыбритания Парламентінде Қазақстанмен ынтымақтастық жөніндегі көппартиялық топ жұмыс істейді. Топ төрағасы қызметін Ұлыбритания Парламентінің Қауымдар палатасының мүшесі Боб Стюарт атқарады.

2016 жылғы ақпанда Қазақстанның Ұлыбританиядағы Елшісі Е. Қазыханов Қазақстанмен ынтымақтастық жөніндегі көппартиялық топ мүшелеріне арналған брифинг өткізді.

2016 жылғы қазанда аталған көппартиялық топ мүшелерінің Астана қаласына алғашқы сапары өтті. Сапар аясында британдық депутаттар Қазақстан Парламенті палаталарының басшылығымен, ҚР Премьер-Министрімен және басқа да министрліктер мен ведомстволар жетекшілерімен кездесулер өткізіп, парламентаралық ынтымақтастықты одан әрі жандандыру мәселелерін талқылады.

Сауда-экономикалық қатынастар

Ұлыбритания Қазақстан экономикасына тікелей инвестициялар көлемі бойынша көшбасшы бестік құрамында. 2005-2017 жылдар аралығында Қазақстанға құйылған британ инвестицияларының көлемі 12 млрд АҚШ долларынан асты.

2017 жылғы қаңтар-сәуір айлары аралығында екі ел арасындағы сауда айналымы 422,6 млн АҚШ долларын құрап, былтырғы жылмен (334,3 млн долл.) салыстырғанда 21%-ға өсті. Экспорт 31%-ға ұлғайып, 331,7 млн. долларды, импорт – 90,8 млн долларды құрады.

Экспортқа шығарылатын тауарлар түрі: түсті металл, ферроқорытпалар, химиялық өнімдер, шикі мұнай және мұнай өнімдері, дәнді дақылдар. Импорт түрлері: көтергіш крандар, қозғалтқыштар, өнеркәсіптік жабдық, электр аппаратуралары, оптикалық және медициналық аспаптар, дәрі-дәрмек, әуе аспаптары және машина бөлшектері, құрыш конструкциялары, химиялық өнім және антиквариат.

2013 жылғы 30 қазанда Сауда-экономикалық, ғылыми-техникалық және мәдени-гуманитарлық ынтымақтастық жөніндегі қазақстан-британ үкіметаралық комиссиясы құрылды. Комиссияның алғашқы отырысы сол жылғы 5 қарашада Астанада өтті.

Қазақстан-Британ үкіметаралық комиссиясының екінші отырысы 2015 жылғы 3 қарашада ҚР Президентінің Ұлыбританияға ресми сапары аясында өткізілді. Отырыс барысында «Жаңа Жібек жолы», «ЭКСПО-2017» және «Астана» халықаралық қаржы орталығын құру сияқты бірқатар жобалар бойынша екіжақты ынтымақтастық мәселелері қарастырылды.

Сонымен бірге басқа да екіжақты құрылымдар жұмыс істейді. 2015 жылғы 24 ақпанда «Самұрық-Қазына» ҰӘҚ» АҚ және Ұлыбританияның Сауда және инвестициялар жөніндегі агенттігі Іскерлік кеңес құрды. Кеңестің бірінші отырысы 2015 жылғы 3 қарашада Мемлекет басшысының Ұлыбританияға ресми сапары барысында өтті. Отырыс қорытындысы бойынша жалпы құны 208 млн АҚШ долларын құрайтын 14 екіжақты құжатқа қол қойылды.

2017 жылғы қыркүйектен бастап британ Парламенті Лордтар палатасының мүшесі Баронесса Эмма Николсон Ұлыбритания Премьер-Министрінің Қазақстандағы сауда өкілі болып қызмет атқарады.

Қытайдың көтерме сауда орталығы болып табылатын Иу қаласынан тікелей теміржол жүк тасымалдарын Қазақстан, Ресей, Беларусь, Польша, Германия, Бельгия және Франция арқылы Лондонға жеткізу 2017 жылдың маңызды оқиғасы болды. Қазақстандық «KTZ Express» АҚ компаниясы аталған жүк тасымалының операторы болып таңдалып алынды.

Қазақстанда 800-ден астам британдық заңды тұлға тіркелген. Олардың аса ірілері болып табылатын Royal Dutch Shell и Ernst&Young компаниялары ҚР Президенті жанындағы шетелдік инвесторлар кеңесінің мүшелері. Қазақстанда қызмет атқаратын британдық жетекші компаниялардың арасында Rolls Royce, Rio Tinto, BAE Systems, AstraZeneca, GlaxoSmithKline, PwC, KPMG, Wood Group, William Hare, WorleyParsons, Petrofac, сондай-ақ Baker & McKenzie, Norton Rose Fulbright, White & Case, Reed Smith, Michael Wilson & Partners, Dentons, Dechert, Morgan Lewis компанияларының өкілдіктері бар.

Ұлыбританияда қазақстандық бизнес атынан «Самұрық-Қазына» Ұлттық әл-ауқат қоры, «Қазақтеңізкөлікфлоты» ҰТКҚК» ЖШС және «Эйр Астана» әуе компаниясы жұмыс істейді.

Лондондық қор биржасында жалпы капиталы 5,8 млрд британ фунт стерлингін құрайтын EP KazMunaiGas, HalykBank, Kcell, Kazkommertsbank сияқты қазақстандық компаниялардың және Nostrum Oil & Gas, KAZ Minerals, Goldbridges, Chagala Group секілді негізгі капиталдары Қазақстанда тіркелген 4 компанияның акциялары айналуда. Лондондық қор биржасының AIM сияқты кішігірім және дамып келе жатқан компанияларға арналған платформасында Steppe Cement, Tau Capital, Roxi Petroleum, Central Asia Metals, Jupiter Energy, Kemin Resources компаниялары тіркелген.

2009 жылдан бері қазақстандық «JSC Kazakhstan Aluminium Smelter» аллюминий компаниясы Лондон металл биржасының қатысушысы болып табылады.

«Самұрық-Қазына» ҰӘҚ-ның Лондондық қор биржасында өткізген «Инвестор күні» - Қордың аса ірі активтерін жекешелендіру бойынша алғашқы шетелдік роуд-шоу 2017 жылдың аса ірі оқиғаларының бірі болды. Іс-шараға Ұлыбританияның Сауда және инвестициялар жөніндегі мемлекеттік министрі Г. Хэндс, Лондондық қор биржасының бастапқы нарықтар жөніндегі басшысы Р. Барнс, ҚР Ұлттық экономика министрі Т. Сүлейменов және «Самұрық-Қазына» ҰӘҚ» АҚ басқарма төрағасы Ө. Шөкеев қатысты.

Ұлыбритания «ЭКСПО-2017» халықаралық көрмесіне қатысуын растаған және Ұлттық комиссарын тағайындаған алғашқы елдердің бірі. «Біз – Энергиямыз» тақырыбындағы аумағы 1,100 шаршы метрді құраған британдық павильон қазақы киіз үй пішіндес болды. Ұлыбритания жұртшылыққа графенді – болашақта энергияны өндіру және қолдану жолын түбегейлі өзгертуге қабілетті материалды таныстырды.

ЭКСПО аясында 2017 жылғы 8-10 шілдеде Астанаға Лондондық Ситидің Лорд-мэрі Э. Пармли бастаған британдық аса ірі бизнес-делегация келді. Сапар барысында Э. Пармли ҚР Премьер-Министрі Б. Сағынтаевпен, «Астана» халықаралық қаржы орталығының басқарушысы Қ. Келімбетовпен және «Kazakh Invest» ҰК басқармасының төрағасы М. Қабашевпен кездесулер өткізді.

Ұлыбритания қызметі ағылшын құқығына негізделген «Астана» халықаралық қаржы орталығын құруға белсене атсалысуда. Тараптар ҚР Президентінің 2015 жылғы қарашада Лондонға жасаған сапары кезінде қол қойылған АХҚО, TheCityUK корпорациясы және ЕҚДБ арасындағы ынтымақтастық туралы меморандумды іске асыруда.

2017 жылғы 5 мамырда ҚР Лондондағы Елшілігінде Baker McKenzie, Devonshires Solicitors, Hogan Lovells, Michelmores, Norton Rose Fulbright, White & Case сияқты британдық заң компанияларының қатысуымен АХҚО жанында құрылған консультативтік-кеңесші орган болып табылатын Құқықтық консультативтік кеңестің бірінші отырысы өтті.

2017 жылдың сәуір-қыркүйек айлары аралығында Лондонда 14 қазақстандық судья және Қазақстанның сот органдарының қызметкерлері ағылшын жалпы құқығының, коммерциялық, келісімшарттық және кәсіпкерлік құқықтарының негізгі қағидаларын меңгеруге бағытталған арнайы интенсивті құқықтық дайындық курстарынан өтті. Оқу курсы арнайы АХҚО қажеттілігіне негізделіп, Лондон университетінің беделді құқық мектебінде өткізілді. Оқу «Болашақ» халықаралық Президенттік стипендиясының қолдауымен ҚР Жоғарғы соты және АХҚО басшылықтарының бастамасымен ұйымдастырылды.

2017 жылғы қаңтардан бастап Ұлыбритания азаматтары ЭЫДҰ-ға мүше елдер азаматтары сияқты Қазақстанға 30 күнге дейін визасыз келе алады.

Мәдени-гуманитарлық ынтымақтастық

Елдер арасында білім беру саласында тығыз қатынастар орнатылған. Бүгінгі таңда Британияда «Болашақ» халықаралық стипендиясы бойынша 600-ден астам қазақстандық студент білім алуда.

2001 жылдан бастап Алматы қаласында серіктестері Ұлыбританияның жетекші жоғары оқу орындары болып табылатын Қазақстан-Британ техникалық университеті жұмыс істейді.

2014 жылы тараптар құны 12 млн фунт стерлингі болатын «Ньютон-Аль-Фараби» серіктестік бағдарламасына қол қойды. Бағдарлама бірлескен инновациялық және ғылыми зерттеулерді қолдауды көздейді, қаржыландырылуы тепе-тең негізде жүзеге асырылады.

Назарбаев Университетінде Лондонның университеттік колледжінің қолдауымен университеттік білім беруге дайындық бағдарламасы, сондай-ақ инженерия мектебін құру жобасы іске асырылуда.

Сонымен бірге, BG компаниясының қолдауымен Назарбаев Университетінің энергетикалық зерттеулер Орталығында ғылыми кітапхана жұмыс істейді және оқуға арналған шәкіртақылар төленіп, қызметкерлердің біліктіліктерін арттыру қамтамасыз етіледі.

2015 жылғы 3 қарашада Лондонда Мемлекет басшысының Ұлыбританияға сапары аясында ҚР Білім және ғылым министрлігі мен Британдық кеңес және Сауда және инвестициялар жөніндегі Агенттіктің ұйымдастыруымен екі ел жоғары оқу орындары ректорларының Форумы өтті. Форум қорытындысы бойынша 13 келісімге қол қойылды.

2015 жылғы қарашада қол қойылған мемлекеттік қызмет саласындағы ынтымақтастық туралы Меморандум аясында жаңа перспективалар ашылуда. Бұл құжат тараптардың «бес институционалды реформа» мен «100 нақты қадамды» іске асыру аясында кәсіби кадрлар даярлау бойынша өзара әрекет етуіне арналған. 2016 жылғы 16-19 наурыз аралығында ҚР Мемлекеттік қызмет істері және сыбайлас жемқорлыққа қарсы іс-қимыл агенттігі сарапшылары тобының Ұлыбританияға алғашқы сапары болып өтті. Сапар аясында Британия мемлекеттік қызметіндегі ағымдағы тенденциялар, рекрутинг, әкімшілік рәсімдер және т.б. мәселелер талқыланды.

Қазақстан мен Ұлыбритания арасындағы тарих және мәдениет саласындағы ынтымақтастық нәтижелі дамуда. ХІХ ғасырда қазақ жеріне келген британдық сәулетші және саяхатшы Томас Аткинсон және оның жұбайы Люси екі ел арасындағы нағыз мәдени көпір болды. Томас және Люси Аткинсондар қазақ жеріне келіп, сол кездегі қазақ халқының өмірі бейнеленген, қазақ сұлтандарымен және билерімен кездесулер суреттелген көптеген күнделіктер, жазбалар мен суреттер қалдырып кеткен алғашқы британдықтардың бірі болды.

2016 жылғы шілдеде Т. Аткинсон ұрпақтарының Қазақстанға сапары өтті. Сапар барысында Алматы облысының Қапал ауылында Т. Аткинсонның ұлы Алатау Тамшыбұлақ Аткинсон дүниеге келген жерде ескерткіш ашылды.

Т. Аткинсонның ХІХ ғасырда Қазақстанға келу тарихы және оның ұрпақтарының араға бір жарым ғасыр уақыт салып ата-бабалары туған жерге сапармен баруы «Қазақстан. Ұлы саяхаттар тарихы» атты деректі фильмге негіз болды. Фильм ҚР тәуелсіздігінің 25-жылдығына арналып, 2016 жылғы 16, 17 және 18 желтоқсанда «Хабар», «Қазақстан», «КТК» арналарында мемлекеттік және орыс тілдерінде көрсетілді. Сонымен бірге, 2016 жылғы 19 қарашадан 16 желтоқсанға дейін «BBC World News» жаһандық телеарнасында еліміздің тәуелсіздігінің 25-жылдығына және «Мәңгілік ел» идеясына арналған «Kazakhstan – the heart of Eurasia. Amazing journey» атты бейнеролик көрсетілді.

2017 жылғы 14 қыркүйекте Лондонда Британдық музейде «Скифтер: ежелгі Сібір сарбаздары» атты скифтер мәдениетіне арналған көрме ашылды. Қазақстан Республикасының Ұлттық мұражайы аталған көрмеге 17 жәдігер қойып, көрменің басты қатысушыларының бірі болды. Атап айтқанда, мұражайға келушілердің назарына Есік қорғанынан табылған «Алтын адамның» қанжары, күміс тостаған (б.э.д. V-III ғасыр, Есік қорғаны), аң стилінде жасалған білезік (б.э.д. VI ғасыр, Тақсай І) және Тақсай, Берел, Талды сияқты жерлерден табылған басқа да археологиялық жәдігерлер қойылды.

2017 жылғы 1-7 қазанда Лондонда британдық және әлемдік қауымды Қазақстанның бай мәдени және тарихи мұрасымен таныстыруға арналған қазақ мәдениетінің фестивалі өтті. Бір апта бойы қазақ өнерінің қарашаңырағы болып табылатын М.Әуезов атындағы Қазақ мемлекеттік академиялық драма театры мен Мемлекеттік республикалық академиялық корей музыкалық комедия театры, сондай-ақ Лондонның «Pajarito Theatre London» театры британ жұртшылығына жазушы, драматург Д. Исабековтың «Жаужүрек», «Актриса» және «Аққу Жібек» атты пьесаларын қойды. Спектакльдер Лондонның «Stockwell Playhouse» және «Bridewell Theatre» театрларында сахналанды.

2016 жылғы желтоқсан айында Қазақстанға әлемге танымал британдық «Top Gear» автомобиль шоуы келді. Бағдарламаның жүргізушілері М. Леблан, К.Харрис және Р. Рейд Мерседес Е 220D, Вольво V70 автомашиналарымен және Лондондық таксимен Оңтүстік Қазақстан облысынан Қызылорда облысына дейінгі жолмен жүріп өтіп, Шымкент, Түркістан, Кентау, Қызылорда және Байқоңыр қалаларын аралады.

«Top Gear» бағдарламасының Қазақстан туралы сюжеті 2017 жылғы 5 наурызда ВВС2 телеарнасында 24-ші маусымның 1 бөлімі аясында көрсетілді. Бағдарламаның миллиондаған көрермендері Қазақстанның бай мәдениеті мен әсем табиғатын көруге мүмкіндік алды. «Союз» зымыранының Байқоңыр ғарыш айлағынан ұшуы сюжеттің шарықтау шегі болды.

Қазақстан мен Ұлыбританияның бұқаралық ақпарат құралдары саласындағы ынтымақтастығы да белсенді дамуда. 2017 жылғы 7 сәуірде ҚР Ақпарат және коммуникациялар министрі Д. Абаевтың Лондон қаласына сапары болып өтті. Сапар аясында Министрлік және «ВВС Worldwide» корпорациясы арасында ынтымақтастық туралы меморандумға қол қойылды. Меморандум «дөңгелек үстелдер», ұлттық және аймақтық БАҚ-қа арналған дәрістер, оқу курстары мен семинарлар, сондай-ақ брендингті ілгерілету сияқты бірлескен жобаларды іске асыруды көздейді.

Сондай-ақ меморандумның мақсаты сандық эфирлік хабар тарату аясында қазақстандық телеарналарды техникалық тұрғыда дамыту мәселелері бойынша бірлескен консультациялар жүргізу, ақпарат және тәжірибе алмасу.

Құқықтық саладағы ынтымақтастық

Құқықтық саладағы ынтымақтастық Қазақстан мен Ұлыбритания қатынастарының маңызды салаларының бірі. Елдер арасында құқықтық мекемелер басшылары мен өкілдерінің сапарлары ұдайы ұйымдастырылып тұрады.

2014 жылдың соңында құқықтық ынтымақтастықты кеңейтуде едәуір жетістікке қол жеткізілді. Атап айтқанда, 2014 жылғы қазанда Ұлыбритания Әділет министрінің орынбасары Э. Фолкстың Қазақстанға сапары өтті, ал сол жылы желтоқсанда ҚР Бас Прокуроры А. Дауылбаев Ұлыбританияға сапармен келді.

А. Дауылбаевтың сапарының басты нәтижесі ҚР Бас Прокуратурасы және Ұлыбритания Әділет министрлігі арасындағы құқықтық саладағы және бірлескен консультативтік комитет құру жөніндегі Меморандумға қол қою болды.

2015 жылдың басында ҚР Премьер-Министрі К. Мәсімов Ұлыбританияға жұмыс сапарымен келді. Сапар аясында ҚР Үкіметінің басшысы Лондонда өткен Ұлы еркіндік хартиясының 800 жылдығына арналған жаһандық құқықтық саммитке қатысып, сөз сөйледі.

Мемлекет басшысының 2015 жылы Ұлыбританияға ресми сапары аясында қылмыстық істер жөніндегі өзара құқықтық көмек жөніндегі келісімге, сондай-ақ ҚР Бас Прокуратурасы, Ұлыбританияның Әділет министрлігі және Ұлттық қылмыстық агенттігінің арасында бірқатар ведомствоаралық келісімге қол қойылды.

2016 жылғы 28 ақпан – 1 наурыз аралығында ҚР Бас Прокуратурасының шақыруы бойынша Қазақстанға Ұлыбританияның бұрынғы Бас Прокуроры, Ұлттар Достастығының Бас хатшысы Баронесса Патриция Скотланд келді. Сапар барысында Қазақстан мен Ұлыбритания арасындағы ынтымақтастықтың құқықтық тұстары талқыланды.

2017 жылғы 22-26 маусымда құрамында ҚР Президенті Әкімшілігі Басшысының орынбасары Т. Донақов, ҚР Жоғары сотының төрағасы Қ. Мәми, ҚР Бас Прокуроры Ж. Асанов, сондай-ақ ҚР ҰҚК, ІІМ және сыбайлас жемқорлыққа қарсы бюросының өкілдері бар делегация қылмыстық сот әділдігі саласындағы реформалар мәселелері бойынша тәжірибе алмасу мақсатында Лондонда сапармен болды.

Әскери және әскери-техникалық ынтымақтастық

Бітімгерлік дайындық, қазақстандық әскери қызметкерлерді Ұлыбританияның жоғары оқу орындарында оқыту, сондай-ақ тіл меңгеру және әскери-техникалық саладағы ынтымақтастық екі ел арасындағы әскери ынтымақтастықтың негізгі бағыттары болып табылады.

Жыл сайын Қазақстан және Ұлыбритания қорғаныс ведомстволарының екіжақты ынтымақтастық жоспары қабылданады. Аталған жоспарды іске асыру мақсатында қазақстан-британ жұмыс тобы құрылған (жыл сайын Астан және Лондон қалаларында отырыс өткізеді). 2016-2017 жылдарға арналған жаңа екіжылдық ынтымақтастық жөніндегі жоспар 2015 жылғы желтоқсанда қабылданған болатын.

Британиямен техника саласындағы ынтымақтастық басымды бағыттардың бірі болып саналады. Бұл тұрғыда 2015 жылғы сәуір және мамыр айларында британ қарулы күштерінің Ауғанстаннан шығуы аясында квадроциклдер мен түнгі көру аспаптары Қазақстан тарапына өтеусіз берілді.

2016 жылғы 13 қыркүйекте Қазақстан Республикасы және Ұлыбритания Қорғаныс министрліктері арасында әскери-техникалық ынтымақтастық туралы Меморандумға қол қойылды.

Қосылған : 19.10.2017, 11:50, Өзгертілген : 19.10.2017, 18:25